الإصابات العضلية و أسبابها و طرق علاجها [ Muscles Cramps & Injuries ]

بسم الله الرحمن الرحيم

الإصابات العضلية و أسبابها و طرق علاجها:

أعضاء وزوار BULKING SEASON النهاردة هنتكلم عن الإصابات العضلية بأنواعها المختلفة و أسبابها و طرق علاجها ، خاصة لو أنت لسه مبتدء في النشاط الرياضي هنساعدك تتخلص من معظم الآلام العضلية اللي بتواجهها .

الإصابات ممكن تحصل بشكل أساسي لثلاث أسباب رئيسية :

1-الإهمال في تمارين الإحماء قبل البدء في تمرين العضلات و ده خطأ كبير جدا ممكن أي حد يرتكبه ، عضلات جسمك بتكون هادئة و غير مستعدة للحركة فتمارين الإحماء بتساعدك على إدخال العضلات في التمرين بالتدريج و استعدادها لأداء أي مجهود سواء رفع الأثقال أو الجري أو تمارين الألعاب القتالية أو السباحة حتى لو كنت هتلعب أي رياضة الإحماء يخليك تأدي المجهود بسهولة و تستفيد الاستفادة الكاملة من عضلاتك و تحميك من التمزق و الشد العضلي و إلتهاب الأوتار العضلية و غيرها من الإصابات.
2-آداء ميكانيكية التمارين و حركاتها بطريقة خطأ سواء عند رفع الأثقال خصوصا في تمارين الكتفين أو عند التمرين على ضربات الملاكمة و تأديتها بشكل خاطئ عشان كدة لو مش عارف التمرينة بتتعمل إزاي أو طريقة إخراج وتصويب الضربة متترددش في سؤال المدرب بتاعك لأنه أكثر خبرة منك و هيصلحلك الخطأ ، ودي مشكلة تواجه كتير من الشباب انه بيحس بالحرج من سؤال المدرب و ده خطأ طبعا ، حتى الجري لو هتمارسه لازم تتعلم الجري بالطريقة الصحيحة عشان تحمي نفسك من شد عضلات الفخد أو السمانة (عضلات الساق) و مشاكل الركبة و الفيديو يوضح كيفية الجري بالشكل الصحيح لتجنب الإصابات المحتملة .

3-عدم تناول الكمية الملائمة من الكربوهيدرات و البروتينات بعد التمرين ، وده شيء خطير لأن عضلاتك و جسمك بشكل عام بتكون محتاجة للكربوهيدرات لتعويض الطاقة المستنفذه في التمرين و للبروتينات لبناء العضلات و تحقيق استفادتها من التمرين ، أما بقى في حالة إهمال التغذية بعد التمرين هيكون ضرر كبير جدا على جسمك و مش هتحقق الاستفادة الكاملة من التمرين و هتحس بآلام مبالغ فيها و ممكن تخليك تكره التمرين ! و من الأخطاء الشائعة جدا بين الناس إنه ميأكلش بعد التمرين عشان ينزل وزنه ، دي أكبر جريمة ممكن ترتكبها في حق جسمك لأن جسمك عشان يحرق دهون بعد التمرين محتاج للطاقة إللي هيحصل عليها من الأكل من الكربوهيدرات و البروتينات عشان يبني العضلات ، أما لو أهملت وجبة قبل و بعد التمرين جسمك مش هيلاقي مصدر للطاقة بعد التمرين إلا العضلات هيضطر ياخد منها الطاقة و ساعتها ودع عضلاتك اللي تعبت فيها .

أنواع الإصابات : 

1- الشد العضلي.

2- التمزق العضلي.

3- الارتشاح الدموي العضلي.

4-إلتهاب الأوتار العضلية.

لعلاج معظم الإصابات :

1- الثلج هو كلمة السر لعلاج الإصابات المختلفة ، عن طريق عمل كمادات من الثلج ووضعها على مكان الإصابة من 10 ل 15 دقيقة مرات متعددة في اليوم حسب الإصابة و بعد الإصابة مباشرة.

2- مراجعة الطبيب أو المدرب الخاص بيك لتوجيهك بعد الإصابة لحد الشفاء منها بإذن الله.

3- الراحة لمكان الإصابة لحين الشفاء من الاصابة و البعد عن التمرين أو الضغط على العضلة لحين شفاءها تماما عشان حالتها متزدادش سوء.

4- تجنب الأخطاء المؤدية للإصابة في المرات القادمة.

في الختام أتمنى الموضوع يكون أفادكم و متنساش تشير ع الفيسبوك و تشارك معانا برأيك في التعليقات.